‘सहिदको सपना पूरा भएकै छैन’

Ishwor Pokhrel इलामको ठूलो टुँडिखेल नजिकै रहेको सहिद रत्नकुमार वान्तवाको सालिकमा माल्यार्पण गर्दै नेकपा एमालेका महासचिव इश्वर पोखरेल । तस्बिर ः गोविन्द लामिछाने, इलाम, रासस

इलाम, २७ चैत । नेकपा (एमाले) का महासचिव ईश्वर पोखरेलले सहिदको सपना अझै पनि पूरा भइनसकेको बताउनुभएको छ ।

सहिद रत्नकुमार वान्तवाको ३८ औंँ स्मृति दिवसका अवसरमा आज बिहान ठूलो टुँडिखेल नजिकै सालिकमा आयोजित कार्यक्रममा महासचिव पोखरेलले सहिद वान्तवाले देखाएको बाटामा निष्ठा र दृढताका साथ अविचलित नभई लाग्न आग्रह गर्नुभयो । “वान्तवा सामान्य कार्यकर्ता नभई एक कुशल, निडर, क्षमतावान् र नेतृत्वदायी व्यक्तित्व थिए”, उहाँले भन्नुभयो ।

Subas Chandra Nembang

इलामको ठूलो टुँडिखेल नजिकै रहेको सहिद रत्नकुमार वान्तवाको सालिकमा ३८औं स्मृतिका अवसरमा आइतबार मन्तव्य राख्दै नेकपा एमाले संसदीय दलका उपनेता सुवासचन्द्र नेम्वाङ ।


सोही अवसरमा नेकपा (एमाले) संसदीय दलका उपनेता सुवासचन्द्र नेम्वाङले सहिदको सपना अझै पनि साकार नभएकाले संविधान कार्यन्वयनमा दृढतापूर्वक लाग्नुपर्नेमा जोड दिनुभयो । ‘सहिदको सपना अझै पूरा भएको छैन, अब तीनै तहको निर्वाचन सम्पन्न गरेर देशलाई आर्थिक समृद्धिको मार्गतर्फ लैजानुपर्छ, अनि मात्र सहिदको सपना पूरा हुन्छ,’ नेता नेम्वाङले भन्नुभयो ।

सहिद वान्तवालाई ओली सरकारले सहिद घोषणा गरेको हो । वान्तवाको जन्म २००८ साल चैत २७ गते चमैताको चित्रे भन्ने स्थानमा भएको थियो । पञ्चायती सरकारले वान्तवालाई २७ वर्षका उमेरमा चैत २७ गते नै इलामको इभाङमा गोली हानी हत्या गरेको थियो । रासस

You Might Also Like