rastriya pariksha board

काठमाडौँ, चैत २५ गते । राष्ट्रिय परीक्षा बोर्डले कक्षा ११ र १२ को वार्षिक परीक्षा अर्को निर्णय नभएसम्मका लागि स्थगित गर्ने निर्णय गरेको छ । कोरोना संक्रमण (कोभिड १९ ) को संक्रमण फैलेर समुदाय तहसम्म पुग्ने अवस्थामा रहेको तथा बैशाख ३ गतेसम्म देशभर लकडाउन जारी रहेको अवस्थामा परीक्षा गर्न नसकिने भन्दै हाललाई परीक्षा स्थगन गर्ने निर्णय बोर्डले गरेको हो ।

बोर्डले २०७७ सालको बैशाख ८ गतेबाट कक्षा १२ तथा बैशाख २१ गतेबाट ११ को परीक्षा गर्ने कार्यतालिका सार्वजनिक गरेको थियो । अब संक्रमणको त्रास कम भएर जनजीवन सामान्य भएपछि नयाँ परीक्षा तालिका सार्वजनिक गरिने जानकारी बोर्डका अध्यक्ष प्रा.डा. चन्द्रमणि पौडेलले दिनुभयो ।

यसका साथै कोरोना भाइरसको संक्रमण नियन्त्रण गर्न सरकारले जारी गरेको लकडाउन हटेर मुलुकभरको जनजीवन सामान्य नभएसम्म माध्यमिक शिक्षा परीक्षा (एसईई) नहुने बोर्डले जनाएको गरेको छ । साथै एसईई परीक्षा हुने नयाँ कार्यतालिका प्रकाशन नगरिएको र परीक्षा हाल स्थगनकै अवस्थामा रहेको बोर्डले स्पष्ट पारेको छ ।

बोर्डका परीक्षा नियन्त्रक रामराज खकुरेलले लकडाउन जारी रहेको तथा संक्रमणको त्रास कायमै रहेको अवस्थामा एसईई परीक्षा कहिले गर्न सकिन्छ भन्ने कुरा यकिन नै गर्न नसकिएको बताउनुभयो । यस अवस्थामा कुनै पनि भ्रममा नपर्न, धैर्य गर्न विद्यार्थी तथा अभिभावकलाई बोर्डले आहन गरिएको छ । ‘विद्यार्थीमा कोरोना भाइरसको भय, त्रास रहेको अवस्थामा परीक्षा गर्न सकिने सम्भावना हुँदैन, मुलुकभरको अवस्था सामान्य नभएसम्म परीक्षा गर्न सम्भव देखिदैन’ परीक्षा नियन्त्रक खकुरेलले बताउनुभयो ।

लकडाउन खुलेर जनजीवन सामान्य हुने थालेपछि पनि परीक्षाका लागि विद्यार्थीलाई केही दिन समय दिइने जानकारी परीक्षा नियन्त्रक खकुरेलले दिनुभयो ।

एसईईमा अनिवार्य छ वटा विषयको प्रश्नपत्र प्रदेश पिच्छे अलग अलग गरिए पनि दुई वटा ऐच्छिक विषयको प्रश्नपत्र भने सबै प्रदेशबाट परीक्षा दिने विद्यार्थीको एउटै बनाइएको छ । यो अवस्थामा एसईईको परीक्षा गर्न देशभरकै जनजीवन सामान्य हुनुपर्ने र त्यसकै प्रतिक्षा भइरहेको बोर्डले जनाएको छ ।-via gorkhapatra online